ലാ ലിഗയില്‍ വിജയക്കുതിപ്പ് തുടര്‍ന്ന് റയല്‍ മാഡ്രിഡ്. ലെവന്റെയ്‌ക്കെതിരായ മത്സരത്തില്‍ ഒന്നിനെതിരെ നാല് ഗോളുകളുടെ വന്‍ വിജയമാണ് ഇത്തവണ റയല്‍ സ്വന്തമാക്കിയത്. റയലിന് വേണ്ടി ഫ്രഞ്ച് സൂപ്പര്‍ താരം കിലിയന്‍ എംബാപ്പെ വീണ്ടും ഗോളടിച്ച് തിളങ്ങി. എംബാപ്പെ ഇരട്ട ഗോള്‍ നേടിയപ്പോള്‍ വിനീഷ്യസ് ജൂനിയറും ഫ്രാങ്കോ മസ്തന്റുവാനോയും റയലിന് വേണ്ടി വലകുലുക്കി.
മത്സരത്തിന്റെ 28-ാം മിനിറ്റില്‍ വിനീഷ്യസ് ജൂനിയറാണ് റയലിനെ മുന്നിലെത്തിക്കുന്നത്. പത്ത് മിനിറ്റിനുള്ളില്‍ അര്‍ജന്റീന താരം മസ്തന്റുവാനോ റയലിന്റെ ലീഡ് ഇരട്ടിയാക്കി.
രണ്ടാം പകുതിയില്‍ ലെവന്റെ ഒരു ഗോള്‍ തിരിച്ചടിച്ചു. 54-ാം മിനിറ്റില്‍ എറ്റ ഇയോങ്ങാണ് റയല്‍ മാഡ്രിഡിന്റെ വലകുലുക്കിയത്. 64-ാം മിനിറ്റില്‍ പെനാല്‍റ്റിയിലൂടെ എംബാപ്പെ ഗോളടിച്ചു. രണ്ട് മിനിറ്റിനുള്ളില്‍ ഡബിള്‍ തികച്ച എംബാപ്പെ റയലിന് വലിയ വിജയം സമ്മാനിച്ചു.
ലാ ലിഗയില്‍ അപരാജിതരായി മുന്നേറുകയാണ് റയല്‍ മാഡ്രിഡ്. ആറ് മത്സരങ്ങളില്‍ ആറിലും വിജയം സ്വന്തമാക്കിയ റയല്‍ പോയിന്റ് പട്ടികയില്‍ ഒന്നാമതായി തുടരുകയാണ്.
Content Highlights: La Liga: Real Madrid thrash Levante as Kylian Mbappe hits double